李城打真军拆纽抢Ｗ
今晚另一场重头戏，纽卡素主场斗李斯特城；「喜鹊」纽卡素上场联赛虽然成功逼和榜首球队利物浦，但整体表现依然攻不锐、守不稳；「狐狸」李城上场收起射手占美华迪搞到喺水晶宫身上痛失两分，今场定必精锐尽出博反弹，加上李城近4次联赛作客圣占士公园录得全胜佳绩，客Ｗ值得支持。
纽卡素上场0比0打和利物浦，成为今季联赛首支对住「红军」力保不失嘅球队，不过如非门将卡尔达路表现「上晒身」，纽卡素一早已失守。其实总计各项赛事，纽卡素已经连续5场未赢过，除咗以2比5大败畀列斯联，主场对住同级对手富咸亦只係打和1比1，加上英联盃输畀英冠球队宾福特，「喜鹊」整体表现唔算理想。中场艾锡希顿因累积黄牌够数今仗坐波监，前锋辛特麦斯明及后衞拿修斯疑染疫肯定缺阵，新兵赖恩费沙又有伤在身，今场残阵应战更加唔乐观。
华迪回归正选搏杀
李斯特城领队罗渣士上仗作客水晶宫玩轮换，正选阵容收起射手占美华迪及泰利文斯等主力，结果喺先失波情况下派佢哋落场，成功追番1比1，但已係「狐狸」近4场联赛第3次失分。为免被前列对手甩开，相信罗渣士今仗会强阵出击，唔敢再玩嘢全力抢分。睇埋对赛往绩，李城对上4次联赛作客纽卡素不但全胜， 而且加埋入咗11球，当中有3场保持0失球，往绩佔尽上风，今场有力反客为主，客胜抵玩。
