罗拔仔又嚟喇！拜仁Encore再炒缅恩斯
拜仁王牌 罗拔利云度夫斯基
今晚继续有德甲，榜首拜仁慕尼黑主场迎战尾二嘅缅恩斯。拜仁实力超晒班，箭头罗拔利云度夫斯基年尾攞奖攞到手软，旺气逼人，相反缅恩斯未见起色之馀，更发生管理层大地震，而且近年造访拜仁均惨败居多，就算让2.5/3球照捧上盘。
拜仁歇冬前凭罗拔利云度夫斯基梅开二度，以2比1反胜利华古逊，呢名波兰箭头弗到漏油，单计今季联赛已有17球进帐，更喺年尾连夺世界足球先生及环球足球奖最佳球员，队友汤马士梅拿及京士利高文并列助攻榜首位，之前重伤嘅防中甘美治亦极速康复，上仗对利华古逊已经后备落场，阵容更齐整。
缅恩斯内部立立乱
相反，缅恩斯今季13场联赛仅1胜，上次赢波已经係上年11月尾嘅事，球员信心必定出现动摇，而且歇冬期间，缅恩斯更发生管理层大地震，前总经理希度进入董事局，前主帅马田舒密特则担任体育总监，季初先接手嘅主帅列迪即时被炒，教练一职暂由青年军教头施维特顶上，内部立立乱，话对军心冇影响就假喇！翻查纪录，拜仁近3次主场对缅恩斯唔单止赢晒，更狂轰16粒，而且每场都赢至少4球，包括上次大炒6比1，缅恩斯依家弱上加弱，今场都係等炒格，上盘咪错过。
