热刺蓄锐抢头胡
列斯联有前冇后易中伏
英超圣诞新年快车尾站重头戏，热刺主场火併列斯联。虽然热刺近况跌Watt，但主帅摩连奴向来係功利主义者，撞正坚持有前冇后嘅比尔沙领军嘅列斯联，真係啱晒佢哋打反击，加上周中快车取消，以逸待劳兼主场特醒下，今仗绝对係反弹好时机，喺新一年开个靓头，主胜有计。
热刺近期走势转弱，不过主场出击却极有把握，近7场主场赛事取得6胜1负，当中有5场保持零失球，演出稳定。虽然哈利卡尼及孙兴民近期状态跌咗少少，但两人嘅合作及质素均属顶级，只要出现机会仍能一击即中，效率极高，况且有拉美拿、贝云积等后备随时候命，领队摩连奴即使作出轮换，战斗力亦毋须怀疑。
摩连奴「功利主义」擅打反击
今季重返英超嘅列斯联，确令球迷刮目相看，领队比尔沙充满娱乐性嘅进攻踢法，赢得球迷掌声，不过喺反击战成主流嘅英超赛场，列斯联作客遇强照样抢攻难免蚀底，睇番佢哋近5场作客成绩，曾以1比3输畀车路士，及喺「玫瑰打吡」以2比6惨败畀曼联，今场面对擅打稳守突击嘅领队摩连奴，列斯联随时正中下怀，因为热刺之前4场联赛失分，大部分都係面对龟缩球队，难得今遇中门大开嘅列斯联，实大把空位打反击。
何况热刺周中对富咸一仗，因有数名富咸职、球员染疫宣布延期举行，变相令佢哋得到较多休息时间，养精蓄锐有力喺地头赢波，于新年攞头威，主胜有计。
