红军大起纽卡素
收炉战全力抢攻
英超2020年收炉战，由1哥利物浦压轴做主角，作客圣占士公园球场斗纽卡素。红军中后场伤兵陆续复出，主帅高普又可以重施故技，利用高压踢法争胜，佢哋斗亲「喜鹊」都大演入球骚，近4次联赛交手全开4球或以上，2.5球嘅入球大抵玩到爆。
利物浦较早前因为伤病问题，高普避重就轻，改踢稳守突击，虽然入球数字偏低，但成绩仲Keep到，欧联提早出线16强之馀，英超仲做埋1哥。
伤疲尽起重拾斗心
近期红军后防球员伤愈，尤其助攻力极强嘅双翼衞安德鲁罗拔臣及阿历山大阿诺特复出，重现高压战术，前仗7比0蹂躏水晶宫，上仗虽然倒灶1比1仅和西布朗，但其实球队发挥不俗，只係受制于西布朗嘅零前锋战术以致失分。吸取教训后，今场肯定会全力抢攻，以免重蹈上场领先被追和嘅覆辙，斗心毋须怀疑。
纽卡素近年斗利物浦都畀唔到压力红军，最近4次联赛对垒输晒之馀，每场最少失3球，「喜鹊」后防犹如放题，穆罕默德沙拿同沙迪奥文尼，各自喺呢4场赛事累积入3球，相信高普今场会畀2人齐齐正选丧攻纽卡素。
不过纽记主场有一定入球能力，红军近6次作客圣占士公园球场，场场有失波，而且上场斗曼城轮休嘅哥林威尔逊今仗更会复出，可以同红军斗攻，球迷今晚捱夜睇波，亦肯定唔会眼瞓，2.5球大极抵玩，到时睇波再追走地，随时执多两注埋个靓年。
