伦敦打吡热刺速斩富咸
接连喺联赛失分嘅热刺，今晚「伦敦打吡」主场扑击富咸。曾经上过几周榜首嘅热刺，依家已经跌出前4，死要脸嘅领队摩连奴，当然会柯打球队全力抢攻，佢哋实力及状态均比富咸优胜，主场出击3分志在必得。富咸实力所限，只能输少当赢，加上热刺近6次联赛主场出击，5次半场领先，捧半场主胜。
摩连奴斗「弃将」柏加唔衰得
富咸领队柏加同「寸王」有少少渊源，球员年代柏加喺2004年1月加盟车路士，不过当年夏天摩连奴就成为车仔主帅，但柏加唔係佢战术计划入面，虽然当年车路士历史性首夺英超冠军，惟柏加因为只曾上阵4次，并未获得英超冠军奖牌，更于季尾被卖去纽卡素。
二人重遇角色同身份都转晒，但以「寸王」性格，当然唔会输畀自己弃将，如果再喺对方身上失分，真係样衰到爆，预期热刺主场出击，肯定丧攻富咸。热刺上场作客虽然畀狼队逼和1比1，但其实热刺喺开赛56秒已经入波，可见球队嘅闪击战术仍可信赖。
富咸「拆礼物日」同修咸顿互交白卷，累积已经5场不胜，球队欠缺英超竞争本钱，而且今季「伦敦打吡」战绩差劣，先后不敌阿仙奴、水晶宫及韦斯咸，当中两场半场已经落后，毫无抵抗能力，加上热刺惯于主场快刀斩乱麻，近6次联赛主场出击5次半场领先，半场主胜分头不俗值捧。
