欧联分组开打，今晚又有C朗睇喇！曼联喺欧联分组赛F组作客年青人，系C朗回归「红魔鬼」后第一场欧洲赛。曼联再度「魔性爆发」，全靠C朗激活队友，联赛首战就梅开二度，球迷暂时可以将曼联列为长捧球队，今场作客瑞士赢波唔难，睇番年青人近7次斗英超兵，6次半场落后，推介半场客胜。
曼联于上周联赛凭C朗梅开二度，加上般奴费南迪斯及连格各入1球，以4比1大炒纽卡素，为今仗欧联分组赛打下强心针。C朗回归后作用立竿见影，除咗加强球队入球把握力，其余球员喺呢位葡萄牙球星感染下，演出都明显有进步，球队侵略性大增，预料「红魔鬼」领队苏斯克查今场会继续派呢名星级前锋踢正选。
追平177场欧联上阵纪录
C朗今场上阵的话，将追平前皇马队友卡斯拿斯177场欧联最多上阵次数纪录。C朗咁多年都保持佳态，喺欧联呢项欧洲最顶级赛事持续交出好表现，以134个入波成为「欧联入球王」，佢系唯一一位于同一届6场分组赛都入波嘅球员，同时亦系唯一一名球员喺3次欧联决赛都取得士哥，实在巴闭。
年青人今次虽然主场迎战，但相信都系捱打居多，2018年分组赛双方曾经碰头，两战均由「红魔鬼」胜出。事实上，年青人同英超球队实力有一段距离，近7次于欧洲赛面对英超兵只得1和6负，当中6次半场已经落后，对住气势正盛嘅曼联，年青人睇嚟好难顶得到半场，半场客胜玩得过。
