光辉残阵首战输德
澳职新季赛程畀疫情打乱，唔少赛事都要改期，喺大部分球队都踢咗2至3场下，珀斯光辉今日先首度亮相，主场迎战信心十足嘅阿德莱德联。光辉今场将要以残阵出击，相反阿德莱德联愈战愈勇，可以直取客胜。
珀斯光辉备战新球季诸多阻滞，上年12月初不敌FC东京结束亚冠盃之旅，今仗係佢哋1个多月后首场正式比赛，大军踢完亚冠盃返澳洲后，又要进行2个星期隔离，大大影响开季备战，球员状态又点会好？
阿德莱德联新星有惊喜
阵容方面，光辉亦严重不整，日本球星太田宏介只係啱啱展开隔离，曾踢过德甲嘅兰金更加未返到澳洲，加上中场核心兼队长迪亚高卡斯度受伤，今场战力随时得番一半。唔好忘记，光辉对上5季开咧战都赢唔到波，证明球队要经过一段时间先Run得顺。
作客嘅阿德莱德联自从上季尾由维亚特执教后，7场赛事3胜4和未输过，包括今季0比0和西部联，以及上仗2比0轻取劲旅墨尔本城，17岁新星穆罕默德托尼更加技惊四座，成为阿德莱德联今季一大武器，今场有力打败残阵出战嘅主队，客胜要捧。
