李城半场和要追
林柏特保饭碗车仔缩住踢
今晚英超尾场大战，「狐狸」李斯特城主场迎战车路士。「狐狸」虽位居前列，但主场表现反而唔及作客，而且占美华迪上仗伤出，难免影响攻力，车仔联赛战绩远逊预期，同主帅林柏特乱点鸳鸯有关，为保帅位一定先求稳阵，加上近年碰头旺开半场和，不妨追多铺。
李斯特城今季异军突起，除咗老将「华Dee」占美华迪士哥不断外，哈维班尼斯、占士麦迪臣等土炮亦表现抢镜。不过要留意，与今季9场联赛客场赢7场相比，「狐狸」今季9场联赛主场仅获4捷，单计近5场联赛主场，只得2胜1和2负，包括输畀弱旅富咸。
华Dee有伤未必够弗
虽然主帅罗渣士一直希望加强应付阵地战，不过「狐狸」最煞食嘅依然係突击，亦係主场面对龟缩客军束手无策嘅主因，而「华Dee」上仗赢修咸顿临尾拉伤被换出，就算出得都未必够弗。
车仔季前重金收购夏维斯、迪姆华拿等新兵，但佢哋迟迟未融入球队，前者更适合出任无锋阵嘅箭头，透过不断走动拉散对手防线，製造空位畀速度奇高嘅华拿突破，可惜主帅林柏特畀夏维斯试匀晒多个中场位置，只係暴露佢攻强守弱嘅问题，华拿冇中锋掩护下频频失机，「林伯」排阵失当责无旁贷，难怪近7场联赛仅2胜，上仗收起呢对德国孖宝，有番基奥特亦久攻不下打少个嘅富咸，直至末段先靠美臣蒙特奠胜，进攻毫无章法。
而且车仔今季遇强即屈，先后输畀利物浦、曼城及阿仙奴，只能打和热刺及曼联，连欧联入场券都未必能够争到手，「林伯」深明班主阿布拉莫域炒领队绝不手软，今场一定小心翼翼。两军近5次交手各得1胜3和1负，其中4场开半场和，半场波胆皆为0比0，睇得出每次碰头大家都稳阵行先，半场和值得再追。
