热刺超班撑半主
奖盃猎人摩连奴靠得住
英联盃4强今晚揭开战幔，热刺主场迎战英冠仔宾福特。宾福特喺英联盃先后淘汰4支英超兵，但对住实力同状态极佳嘅热刺，係时候止步。热刺主帅摩连奴之前4次带队入英联盃4强，最终都捧盃而回，杀入决赛可以话係基本任务，加上佢哋近10次主场出击，8次领先半场，半场主胜不容错过。
热刺今季踢盃赛一路以来嘅部署，都係以加里夫巴利同卡路士云尼斯奥斯等担正，其馀主力轮流上阵，老实讲速度同侵略性始终差咁啲。咁啱上述两人今仗因伤上阵成疑，摩连奴大条道理搵番正选嗰班出战4强。哈利卡尼及孙兴民点弗法唔使多讲，特别係佢哋对冠军奖盃嘅飢渴感，先至令你安心支持。
可能你会质疑对住英冠仔唔使出全力啩？咁你就错喇，摩连奴出名「奖盃猎人」，依家机会摆喺眼前点会轻易放过，更何况佢之前分别喺2004/05、2006/07、2014/15同2016/17年球季，4次带队杀入英联盃4强，最终带领车路士3次同曼联1次捧盃而回，今场自然有十足把握。
宾福特套路被睇穿
上季喺升班附加赛决赛饮恨嘅宾福特，今季喺英冠仍位居前列，成绩唔错。佢哋近4轮英联盃面对修咸顿、西布朗、富咸及纽卡素等，法定时间取得3胜1和未输过，成功将呢4支英超兵踢出局。不过呢4队实力比热刺曳，更何况宾福特嘅套路，摩连奴肯定精心研究过，「蜜蜂仔」都係时候行人止步，热刺赢波唔难，但赔率太热，睇番佢哋近10次地头出击，8次领先半场，今场都係快刀斩乱麻格局，半场主胜要捧。
