麦克阿瑟抢W唔留手
今日澳职头场，由FC麦克阿瑟主场对中岸水手，今季新加入澳职嘅FC麦克阿瑟，虽然经验较浅，但人脚班底不俗。反观中岸水手近年成绩差劣，唔计中立场赛事，上季11场联赛作客仅得1胜10负，捧FC麦克阿瑟主胜为佳。
虽然FC麦克阿瑟只成立3年，但球会投入大量资源组军，包括聘请前澳洲国家队助教米列锡领军，锋线上拥有曾经效力布力般流浪嘅达比舒利，中场人脚更强大，比纳特曾效力西甲球队毕尔包、贝迪斯，并为西班牙国家队上阵过4次。至于来自法国嘅洛斯佩奥踢过欧塞尔、昂热、南锡等球会，加上35岁队长米利根曾经为澳洲踢过4届世界盃，呢条中场线甚具级数，并喺上场以1比0击败西悉尼流浪者，旗开得胜。
墨城阿联做「大」骚
相比之下，中岸水手明显较逊色，过去3季澳职常规赛都排包尾，早已沦为鱼腩球队，上季一度试过连输11场，结果26场联赛仅得5胜3和18负，失波多达55球，全因不设降班制，先至有得继续留喺澳职。可见中岸水手根本冇足够实力喺呢项赛事立足，即使今场遇上「新军」FC麦克阿瑟，恐怕亦难以招架。
至于尾场直播戏码，阿德莱德联主场斗墨尔本城，上季「三料亚军」墨城首战1比0击败布里斯班狮吼，保持水准；阿联近3次对墨城未输过，总入球全开3球或以上，首选入球大。
