曼联访爱华顿做大骚
作客王火力全开
今晚英联盃8强大战，爱华顿主场火併曼联。「拖肥」爱华顿连赢车路士、李斯特城及阿仙奴，信心爆棚，主场出击更加唔会缩，不过曼联今季联赛作客赢晒，往往先落后下反败为胜，堪称英超「反胜王」，加上近11场作客全开3球或以上，2.5球嘅大盘值捧。
爱华顿喺名帅安察洛堤执教下，今季英超开咧头4场赢晒，虽然之后稍为跌Watt，但「肥安」始终係有料之人，经过调整后，「拖肥」近期已全面回勇，接连砌低车路士、李斯特城同阿仙奴。除首席射手卡维特利云继续有货交外，巴西国脚李察利臣亦不时有神来之笔，包括赢李城之役轰入世界波，呢对「双利」组合唔讲得笑。「拖肥」近年投资咁多，点都想有个盃捧吓，今仗为晋级一定抢攻。
另一边厢，曼联啱啱喺奥脱福上演嘅「玫瑰打吡」，以6比2狂数列斯联，火力惊人。查实「红魔」作客仲劲过主场，各项赛事近11场作客赢咗9仗，包括6场英超客场全胜，仲要全部都係先失波下反胜，包括11月初作客今仗对手「拖肥」，「红魔」凭般奴费南迪斯省两粒，以及卡云尼锦上添花反胜3比1，证明佢哋斗心十足。
近11场作客全开3球或以上
老实讲，曼联以哈利马古尼同域陀连迪路夫为首嘅防线，确係唔多靠得住，好在中前场火力够，唔使忧入唔到波，各项赛事近11场作客就勐轰30粒，唔单止全开3球或以上，当中7场更达4球或以上，今仗睇怕不乏入球，2.5球大盘必捧。
