般尼抢分心切大斗狼队
今晚英超头场般尼主场迎战狼队。般尼虽然喺下游挣扎，但近6仗有5场抢到分，演出有起色；狼队近期入得又失得，前锋柏度尼图重拾射门鞋，作客照抢攻，2.5球嘅入球大值博。
柏度尼图脚风甚顺
开咧头两个月联赛未赢过嘅般尼，近期渐入佳境，近6仗联赛取得2胜3和1负，包括赢过阿仙奴同打和爱华顿，唯一输波係不敌剋星曼城，睇得出众将信心回升。佢哋季初失分太多，为抢分护级趁主场之利必定尽做。
狼队向来打稳守突击，前线靠鲁尔占美尼斯数胡，不过呢位墨西哥箭头上月尾对阿仙奴撞爆头要长抖，令人担心攻力下降。好彩柏度尼图及时挺身而出，近5仗联赛入3粒，包括上仗反胜「车仔」嘅绝杀士哥，至今累积4个联赛入波，比上季仲多一粒，证明愈踢愈好。同时主帅纽奴近期採取较为压前嘅打法，进攻板斧係多咗，但防守亦冇咁稳阵，近4仗联赛取得2胜2负，其中3仗开3球或以上，今晚造访急于抢分嘅般尼，随时合演入球骚，2.5球大盘绝对博得过。
