瑞典神锋又伤明年再见
AC米兰射手伊巴谦莫域早前受伤之后，原本近日已经复操，但係呢位39岁瑞典神锋喺操练时又受伤，估计需要再抖10日，意味今年馀下赛事都唔使预佢。
据悉，伊巴谦莫域今次係左脚大腿肌肉受伤，经过检查之后，虽然伤势唔算严重，但估计仍然需要休息10日。由于AC米兰今年只馀下两场比赛，包括今晚意甲作客对萨斯索罗，以及12月24日凌晨主场对拉素，所以最快都要等到2021年，先至可以再睇到呢位瑞典神锋比赛。
伊巴谦莫域今季曾经确诊新冠肺炎，但复出之后，表现仍然大勇，佢今季意甲已经攻入10球。喺伊巴谦莫域近期养伤之下，暂列联赛榜首嘅AC米兰成绩亦走下坡，近两场意甲对住实力较弱嘅帕尔马同热拿亚，结果都只能和波，连番失分之下仅领先第2位国际米兰1分，依家呢位老将要继续抖，AC能否保住榜首之位，实在令人怀疑。
AC作客萨斯索罗吼大盘
「红黑兵团」近两场都踢得慌失失，同样落后之下，仅逼和对手2比2，今晚作客萨斯索罗似乎又有失分危机。不过，考虑AC攻力尚算唔错，已经跨季连续14场联赛，每场入到两球或以上，创出意甲最长连续入球「2+」纪录，捧2.5球入球大係最佳选择。
