煞科重头戏鲸鱼折箭抢尾胡
经过漫长嘅10个月，日职喺今午终于煞科。焦点落喺日职第3至第5位之争，其中名古屋鲸鱼主场迎战广岛三箭。季尾波战意行先，鲸鱼今仗只要赢波即可锁定3哥之位，取得来届亚冠盃资格，加上有埋地利，主胜属不二之选。
日职今季受疫情影响被斩开两截，2月开锣仅踢两轮后中断，延至7月全面重开并改赛制，取消降班并狂开快车，鲸鱼喺重开初期队内一度爆疫搞到成绩走晒样，好彩捱过艰难时期后愈踢愈好，并杀上联赛第3位。
鲸鱼之所以能大翻身，有赖于主场战绩彪炳，16战获11胜3和2负，就连今季冠军川崎前锋到访都要摆低3分，同时自9月5日主场不敌鹿角后，至今长达4个月共10次主场录得8胜2和不败，嚟到煞科日喺主场出击，梗係会搏埋佢。况且，作客嘅三箭已冇嘢可争，近2场更连败，战意欠奉，面对强势嘅鲸鱼更难反弹。
鹿角樱花摄位「大」火併
同时间举行嘅鹿岛鹿角主场火併大坂樱花一样有睇头。按照赛制，日职冠、亚军及天皇盃冠军直入亚冠盃分组赛，联赛季军则获亚冠盃附加赛资格。
不过，若果1月1日诞生嘅天皇盃冠军係川崎前锋或大坂飞脚其中一队，第4名球队就能补上踢亚冠盃附加赛，因此第5嘅鹿角同第4嘅樱花呢场波相当关键，估计双方都会豁出去抢攻，大盘可期。
