热刺强势爆厂
北伦敦打吡卡尼醒神
今晚英超爆发北伦敦打吡，1哥热刺主场斗死敌阿仙奴。热刺今季遇强愈强，近9场联赛不败气势如虹，哈利卡尼为独佔北伦敦打吡士哥王美誉，定必去尽，何况热刺近年主场专剋阿仙奴，仲唔趁「兵工厂」态沉踩多脚咩，一于捧主胜！
热刺喺主帅摩连奴带领下，自开咧战输畀爱华顿后愈踢愈顺，之后9场联赛获6胜3和，包括连挫曼联及曼城，上轮亦踢和车路士，面对强敌不落下风，延续「摩二季效应」。前锋孙兴民及哈利卡尼弗到震，前者联赛已有9球进帐，哈利卡尼亦轰入7球兼交出9次助攻，赛前虽传出佢有轻伤在身，但睇怕都係「寸王」特登放烟幕。而且「哈神」对住阿仙奴特醒，喺北伦敦打吡至今已入咗10球，同艾迪巴约睇齐，若今场再有士哥，就会独佔「北伦敦打吡士哥王」之名，斗心十足。
阿仙奴创造力弱
阿仙奴虽然喺欧霸顺风顺水，可惜联赛曳到无伦，10轮过后仅得13分排第14位，创下球会39年来最差开局，单计近6场联赛只得1胜1和4负，入得两球，其中1球更係12码，进攻创造力弱到不堪。虽然高价新兵汤马士柏迪已好番，但状态未起难担正，严重影响球队转守为攻嘅速度，亦係队长奥巴美扬脚风欠顺嘅主因，加上翼锋尼高拉斯比比仍需停赛，主帅阿迪达真係冇晒计。况且热刺近4次联赛主场对阿仙奴，取得3胜1和，「哈神」喺其中3场有士哥，仇人见面唔会手软，宁买当头起捧热刺主胜。
