列斯旺半和再追
踢法机动玩后劲
周日凌晨英超好戏，车路士主场迎战列斯联。列斯联係今季3支升班球队当中，表现最对办嗰队，球队踢法机动，尤其作客赛事纪律性极强，近4场联赛作客3次开出半场和，今场造访史丹福桥球场，肯定照办煮碗稳中争胜，推介半场和。
依家10战得14分排中游位置嘅列斯联，其实同今场对手车路士只有5分差距，以佢哋嘅阵容嚟讲，成绩已经算係唔错。列斯联上场联赛以1比0击败爱华顿，巴西中场拉芬夏比洛尼下半场一箭定江山，为球队奠胜，呢场胜仗亦係列斯联近4场作客嘅第3胜，可见佢哋即使作客都有强劲战斗力。
列斯联表现出色，领队比尔沙功劳最大，虽然佢有「狂人」称号，但唔係毫无目的疯狂，比尔沙对球队认真同执着，要求球员绝对服从战术指令，佢哋个个听话完美执行领队嘅战术，3场作客胜仗，半场都同对手打和。
车仔欧联搏尽未回气
车路士领队林柏特喺2018至19年期间执教过打比郡，当时连升班附加赛在内，4次对住由比尔沙执教嘅列斯联，只得1胜3负，即使依家两军阵中球员质素更高，但相信林柏特亦唔敢太过冒进，加上车路士上轮联赛恶战热刺后，欧联分组赛作客搏尽赢西维尔4比0，体力或唔及对手，今场宜吼半场和。
