三箭主场硬淨打爆水手
对同级对手应赢则赢
今晚日职有3场补赛，专为角逐亚冠盃嘅3支球队横滨水手、FC东京及神户胜利船而设，其中前两轮宣告衞冕失败嘅横滨水手，将会作客广岛三箭。水手上仗虽大胜劲旅FC东京，但比赛初段其实係捱打局面；广岛三箭主场表现硬淨，对同级对手尤其有赢波把握，三箭主W捧得过。
亚冠盃东亚区赛事将于11月移师卡塔尔举行，3支日职代表水手、东京及胜利船要尽快完成国内赛事，因此今周专程为佢哋加开快车。今季日职赛程本身已经紧密，如今仲要应付快车档期，各队喺轮换下成绩难免波动，当中横滨水手上仗虽大炒FC东京4蛋，但唔代表今仗可以再赢。
水手上仗作客东京，上半场其实係处于劣势，东京几次攻门都错失机会，踢到下半场初段，水手前锋祖利亚山度士连省2粒，其后东京艾法亚施华向对方动粗被逐，水手先叫做稳住局面，到补时阶段再入多2球得以大胜，近3仗作客终于赢波，咪睇得佢哋太高。
巴西双枪可候命
广岛三箭现时排第10位，佢哋近期专注踢好主场赛事，近5次主场录得3胜2负，2场败仗只係输畀大超班嘅川崎前锋同近况大勇嘅大坂飞脚，其馀比赛应赢则赢，加上2位巴西箭头杜格拉斯韦拉及李安度彭利拿均可候命，主胜值得一博。
