AC米兰主场屠雌狼
「战神」伊巴谦大勇
今晚意甲独脚戏，1哥AC米兰主场火併罗马。AC全面复甦，「战神」伊巴谦莫域更摆脱肺炎浴火重生，上轮打吡赢波有办你睇，挟开咧联赛4连胜之势，唔怕时好时坏嘅罗马，主胜有计。
其实AC翻生有迹可寻，早喺上季复赛后已嚟料，喺最后12轮取得9胜3和不败佳绩，包括击败祖记、拉素同今仗对手罗马，锁定欧霸入场券，嚟到今季keep住气势，连盃赛在内7场正式赛事，法定时间豪取6胜1和，包括开季联赛4场赢晒，上轮更喺同市打吡勇挫国际米兰2比1，啱啱从新冠肺炎中康复嘅伊巴谦莫域独建两功，犹如火凤凰重生。呢位老大哥唔单止喺今季已有5粒进帐，仲係主帅与球员间嘅桥樑，凭经验带住辛度东拿利、巴谦戴亚斯等新仔，收到效果。
罗马伤兵多未受考验
另一边厢，「雌狼」罗马连盃赛近3仗全胜，睇落几醒，不过对手只係乌甸尼斯、宾尼云图及年青人之流，而且阵中仍有史摩宁、卡拉科利、基安卢卡文仙尼及尼高路辛尼奥路养伤，最近2次造访圣西路球场都败走，不宜高估。值得一提嘅，係AC唔单止係今季欧洲5大联赛唯一全胜球队，连埋上季在内，佢哋近10场嘅场均入球达2球或以上，係自1964年以来首次，单计今季已有10名球员有入波，攻击点众多，令对手防不胜防，宁买当头起，主胜咪走宝。
