皇马翻身大作战
今晚欧联B组首轮赛事，13届盟主皇家马德里喺二队嘅迪史堤芬奴球场迎战萨克达。「银河舰队」日前联赛意外输波，今仗誓要大炒挽回面子，不过队长沙治奥拉莫斯因伤上阵成疑，防线立立乱，加上佢哋欧联旺大手交易，捧2.5球嘅入球大最划算。
皇马自从上季复赛后，喺联赛经常1球起、2球止小胜对手，今季联赛亦照办煮碗，上场更留力留出祸，主场竟以0比1输畀升班球队卡迪斯，成为西甲91年来首次出现上季盟主兼该轮榜首球队，喺主场输畀升班球队，亦係卡迪斯110年队史上首度作客击沉「银河舰队」，主帅施丹瘀到要搵窿捐，而且嚟紧周末就要喺国家打吡恶斗巴塞，今仗点都要赢波振军心。
拉莫斯受伤防线有漏洞
有指皇马已通知各大媒体，赛前最后操练会闭门进行，似乎唔想太多军情外洩，不过睇番往绩，「银河舰队」踢欧联相对开放，近11场共入19粒，10次开3球或以上，箭头宾施马数胡力强，巴西新星云尼斯奥斯祖利亚季初喺联赛频有士哥，攻力有保证。
乌克兰班霸萨克达今季头5场联赛2胜3和，当中只得1场冇失波，但同时合共轰入12粒，明显入得又失得。佢哋之前受到新冠肺炎影响，出现「萨克达群组」，日前联赛对FC利沃夫，正选连后备一共派咗7位20岁小将披甲，今仗点排阵都未知。既然萨克达上届欧联分组赛6场均有失球，共失13粒，皇马防线亦唔可靠，主W冇肉食，转捧2.5球嘅大盘仲稳阵。
