PSG前锋 莫路伊卡迪
经过两周国际赛，欧洲各地联赛本周末重燃战火，为迁就下周欧联分组赛开打，法甲今晚安排两场比赛，衞冕盟主巴黎圣日耳门（PSG）喺尾场作客斗尼姆。PSG今场虽然阵容不整，不过佢哋近4次对尼姆全部赢晒，共轰13球，实力赢对手成条街，而且今季法甲预期会比过去几季争持激烈，现排第4嘅PSG定必要搏尽，大炒可期。
PSG开季因受新冠疫情影响，喺部分主将缺阵下头2轮联赛输晒，好在随住一众主力陆续康复，联赛4连胜重返正轨，国际赛前一仗更以6比1大炒昂热，重现霸气。PSG今场有中场迪马利亚、守将古沙华及马昆奴斯哥利亚停赛，尼马、基利安麦巴比、马高华拉堤及达斯拿等周中踢完国际赛，匆匆归队未必踢足，但对手尼姆近年係PSG私房菜，过去4次交锋尼姆全部输晒，当中有3次淨输3球或以上，实力上有一定距离，而且尼姆今场亦有多名主将缺阵，包括中场白赖恩干停赛，前锋迪派斯、中场薛迪沙亚、安东尼华拿里奥及杜积域俱有伤在身，情况唔好得过PSG几多，想终止连败走势唔易。
雷恩入球大「安」心买
PSG过去几季喺法甲一支独秀，为留力欧联有唔少失分空间，不过PSG季初表现失准，现时只排联赛榜第4位，而且几支争标假想敌包括雷恩、里尔都有唔错表现，PSG唔想被甩开亦要全力拚尽，定必尽数对手。
至于刚才提过嘅雷恩就会喺头场作客斗迪安；现排榜首嘅雷恩开季6战4胜2和未输过，不过当中只有1场冇失波，近4战场场至少3球交收，踢法攻强守弱；迪安6战得1分失13球，呢场肯定大把士哥睇。
