热刺养精蓄锐半W劫富
今晚英超快车热刺主场斗富咸，热刺今晚对手原本係阿士东维拉，不过由于维拉近日有多人确诊未能出战，英超赛会周一晚先宣布由富咸顶上，最惨富咸上周末仲喺英足盃与昆士柏流浪激战120分钟先晋级，作客养精蓄锐嘅热刺睇怕凶多吉少；热刺近5场比赛4胜1和，而且全部领先上半场，今场博好分拣半场主胜。
热刺对富咸呢场比赛原定上月30日举行，不过当时因富咸队中爆发疫情宣告延期，点知英超赛会周一晚突然宣布，由于维拉阵中有多名球员确诊续要隔离，原定今轮维拉主场对热刺嘅联赛需要延期，取而代之补番热刺对富咸。咁样调法对本身已准备出赛嘅热刺影响唔大，由作客变主场似乎仲有着数添，不过富咸踢完上场英足盃后，原本下场比赛要到周六凌晨先会斗车路士，依家突然加插一场周中补赛，就算英超赛会已将佢哋对车路士一仗延迟一日举行，对板櫈深度一般嘅富咸嚟讲，始终造成一定负担。
卡尼孙兴民抖够出击
热刺上场英足盃作客5比0大炒第8级别球队马连，哈利卡尼及孙兴民都冇落场，预计今场会复任正选攻坚；热刺自从喺联赛接连输畀利物浦、李斯特城后，联赛连盃赛近5场赢4场，表现回勇，而且呢5场全部都喺上半场取得领先，入局极快，今场有望喺体力输蚀嘅富咸身上取得甜头，一于捧半场主胜。
