红魔访凶地恶唔出
开季唔顺嘅曼联今晚压轴战作客纽卡素，曼联国际赛前灾难性咁输场1比6，今晚最紧要稳住后防，但队长哈利马古尼慌失失表现延续到国家队，都唔知醒番未。「喜鹊」每逢主场对曼联特别专注，近4次录得2胜1和，受让半一必捧下盘。
曼联喺国际赛前经历「奥脱福惨剧」，主场畀热刺以6比1蹂躏，仲有安东尼马迪尔领红牌今场停赛。由于夏季转会窗罗致嘅卡云尼要隔离14日，格连活特有望担大旗，不过球员欠斗心及集中力不足，先係曼联开季脱脚嘅主因。
上仗大败畀热刺，中路守将哈利马古尼同艾历拜利频频出错，其中马古尼踢国际赛继续慌失失，搞到英军喺欧国联踢少个输波。呢位「红魔」队长自从喺希腊涉嫌醉酒打人后，一路都未好过，场内场外信心尽失，主帅苏斯克查用唔用佢都左右为难，就算域陀连迪路夫可取代艾历拜利，后防依然冇信心。
纽卡素防守硬淨
纽卡素开季表现稳定，4战录2胜1和1负，虽然入得6球，但亦只失5球，防守力唔曳。「喜鹊」主场斗曼联向来醒神，近4次喺圣占士公园球场交手仅曾1败，遇正低潮嘅曼联有力踩多一脚，随时赢埋都仲得，主场受让极度抵玩。
